موضوع: اشششش ولا كلمه السبت سبتمبر 05, 2009 12:19 am
تسكت الشفاه احيانا وتسكن الحروف القلوب بيقولو السكوت من ذهب بس عمر الصمت مابيبقى دهب الا لو كان فمكانه الا لما يكون وقار وصمت حكمة لكن... لما يكون الصمت ده اجباري غصب ساعتها بس بتفور براكين الظلم وبتتفجر غضب من السلطهـ المسيطره على الشفايف واللسان
لما أخ يضرب اختهـ ويهين كرامتها وانسانيتها ويضربها بقسوة وبدون رحمة وهي تبكي وتستنجد بأبوها بتكون في قمة الضعف تلاقي الاب يصرخ ويقولها انتي بنت وده اخوكي ولد؟؟؟؟؟ ويحط صباعه على شفايفه ويقول...
اشششششش ولا كلمهـ.. شاب طموح عايز يكون نفسه ويبني مستقبله عايز يحقق ذاته يشتغل فشغله ويخلص فيه من قلبه ويتعب ويطحن نفسه شغل وفالاخر يجي واحد مايعرفش أي حاجه في أي حاجه ويمسك منصب مكانه ويبقى احسن منه وتعبه كله يروح ع الفاضي ولما يقولهم ليه يقولو اسكت ده تبع المدير يقول ازاي ده حقي انا يقولو مش عاجبك الباب يفوت جمل ويحطو صوابعهم على شفايفهم ويقولوله....
اششششششش ولا كلمهـ .. بنت لسه صغيره زي أي واحده فسنها بتحلم بالفستان الابيض حاطه ايديها في ايد حبيبها بتعد فالسنين عشان تحقق حلمها وتتفاجأ بنفسها مغصوبة على واحد ماتعرفهوش والسبب تقاليد وان احنا عارفين مصلحتك فين تبكي وتقول يا بابا مش عايزه اتجوزه... يصرخ الاب ويحط صباعه على شفايفه ويقوللها..
اششششششش ولا كلمهـ .. واحد بقى فالجامعه بيحضر محاضراته وبيزاكر بجد مش بيلعب وبيعمل زي مابيقول المثل.. من طلب العلا سهر الليالي وياكل الورق عشان ياخد اعلى التقديرات ويملي ورقة الامتحان حبر اجابات ويجي يلاقي نفسه ساقط فالمادة؟؟؟ ظلم وتبلي من استاذ جامعي بيمارس سلطته يروح يشتكي لعميد الجامعه يقوله منك للدكتور ويحط صباعه فوسط شفايفه ويقوله..
اشششششش ولا كلمهـ .. واحده حبته من قلبها بجد فضلته ع الدنيا والناس ادته كل اللي قدرت عليه استنت منه كلمه حلوه لمسه حنينه على الاقل تنفيذ وعده انه ليها وهي ليه فجأة تلاقي الحال اتقلب وتكتشف انها عبيطه واضحك عليها تروح تقوله ليه؟؟؟ يقولها محدش ضربك على ايدك ويحط صباعه على شفايفه ويقولها...
اششششششش ولا كلمهـ .. ربنا سبحانه وتعالى عادل ومابيرضاش بالظلم والظلم ظلمات يوم القيامة وكل ظالم ليه يوم ياخد فيه جزاءه بس الصمت فالحالات دي بيكون ضعف واللي يقدر لازم يتكلم ولا زم يدافع عن حقه لأن الساكتـ عنـ الحقـ شيطانـ اخرسـ
الثلاثاء سبتمبر 15, 2009 1:01 am من طرف sara hamaky
